Errutinara nola bueltatu

Zein ondo egoten garen oporretan! Etengabeko flow sentsazio hori, ordutegirik ez edukitzea, ardura gutxiago izatea, presaka ez ibiltzea, aisialdiaz gozatzea, bizitzako unerik zoragarrienak bizi ditugula sentitzea eta inoiz ahaztuko ez ditugula pentsatzea, …

Zoritxarrez guztiak dauka hasiera eta bukaera, eta lege honetan oporraldiak ez dira salbuespena.

Honezkero, behin baino gehiagotan etzungo genuen oporren osteko sindromea delako horretaz hizketan, duela urte batzuk modan jarri zen eta pertsona askok izaten omen zuten. Bada, batzuei oporren ostean berriro martxa hartzea erreza egiten bazaie ere, egia da beste pertsona batzuei errutinetara bueltatzea gehiago kostatzen zaiela eta aldaketa horrek esfortzu handia suposatzen diela. Hala ere, horrelako trantsizio naturalak ez dira patologizatu behar sakeletik ateratako sindrome eta nahasmenduekin.

Psikologook badakigu gure burua laneko kontuetaz zeharo deskonektatuta izan dugunean kosta egiten dela berriz ere ohiko errutinetara bueltatzea, prozesu horrek eskatzen duen lan eta egokitzapen kognitiboagatik eta baita, inplikatu dezakeen ezinegon emozionalagatik ere. Hala ere, badira egin ditzakegun trukotxo batzuk trantsizio horrek sortu dezakeen estres egoera gutxitzeko, hala nola:

1. Lo ohiturak erregulatu

Oporren bukaera aldera, gure egunerokotasunera bueltatu baino egun batzuk lehenago, lotara joteko ordua zein lotan ematen ditugun ordu kopurua doitzea gomendagarria da. Hau da, gutxinaka gure ohiko lo ohiturak berreskuratzen joatea ziklo zirkadianoak apurka apurka leheneratzeko.

2. Ohiko otorduak berreskuratu

Sarritan opor sasoian izaten ditugun ordutegi kaotikoek otorduetan desorekak dakartzate, beraz, aspektu hau erregulatzea ere komeni da; gure metabolismoa errutinak ezartzen digun ordutegira eta eskaeretara egokitzen joateko hain zuzen ere.

3. Denbora estrukturatu

Gorputza behar fisiologikoetara ohitzeaz gain, burua ere ohitzea komeni da. Beraz, gutxinaka gure ohiko aktibitate kognitiboa berreskuratze aldera, denbora estrukturatzen hasi gaitezke eginbeharrak programatuz; eta, beharrezkoa izanez gero, agendak, jakinarazpenak edo alarmak erabili ditzakegu.

4. Autozaintzarako uneak mantendu

Norbere burua zaintzea osasun psikologikoa mantentzeko klabeetako bat da. Zenbaitetan errutinako zurrunbiloan hainbeste sartzen gara gure buruaz ahaztu egiten garela. Ondo sentiarazten gaituzten gauza txikitxoei tarte bat eskaintzea gure osasun mentalerako funtsezko kontua da, hala nola, bainu lasaigarri bat hartzea, irakurgai on batetaz gozatzea, gustukoa duzun musika entzutea, … azken finean zure momentu kuttun horretaz disfrutatzea.

5. Emozioen kudeaketa osasuntsua egin

Trantsizio honetan norbaitek edo zerbaitek emozionalki desorekatzen bazaitu, emozio horiek modu adaptatiboan kudeatzea garrantzitsua da. Horretarako, lehenbizi, gure buruari sentitzen ari garen hori sentitzeko baimena eman behar diogu; ostean, emozio horiek identifikatu; azkenik, emozio horiek sortzen dituzten sentsazio fisiologikoak, pentsamenduak eta jokamoldeak tekniken bidez erregulatu.